TERRA DE CULTURA

A asociación Nosa Terra xa ten perfilada unha das súa principais programacións durante o ano. Ao longo de máis dunha semana poderemos gozar de diferentes actos para presenciar e moitas actividades nas que participar.

Non te perdas o noso ciclo LP (Lembranzas de Pereiras) , no que, a través de diferentes proxeccións, poderemos lembrar tempos pasados pero inda cercanos. O grupo de teatro, o Show, o play-back... todos volverán ás nosas retinas e seguro nos traerán agradables recordos.

Tamén te invitamos a participar, e participar activamente, súmate ás nosas propostas activas nas que combinar vida saúdable, patrimonio e coñecemento da parroquia. A través da ruta de sendeirismo, da volta en bicicleta ou do maratón poderás manterte en forma e percorrer Pereiras con diferentes puntos de vista.

Polo noso escenario pasarán consolidados grupos de teatro, novos grupos de música tradicional, humoristas, bailaríns e moito máis, toda unha variedada oferta cultural que non debes perder.

Que ben sexa.

DEPORTISTAS Á MESA

Este sábado comezamos as actividades programadas dentro dunha nova edición de Terra de Cultura.

Pola tarde estaban previstos uns encontros de futbol sala entre solteiros, casadas, solteiras e casados, todos a unha, e pola noite tivo lugar unha cea de confraternización entre todos eles e algúns máis.

A preparación do menú comezou xa a media tarde para que todo estivese preparado para a hora prevista. Os comensais puideron tomar sustancia de polo asado e churrasco acompañado por ensalada e patacas, ademáis de roscón e café.

Finalmente unhas 70 persoas acudiron á cita gastronómico-social enchendo as mesas e cadeiras preparadas con esmero polos membros da directiva e algún voluntario.

Ao remate da cuchipanda fixéronse un par de sorteos de premios mediante os cales algúns dos comensais inda se foron con mellor sabor de boca.

Unha vez máis, bon appétit.

GO TO LONDON

A Asociación “Nosa Terra” está a rematar de perfilar unha próxima viaxe á cidade do Támesis, unha das máis cosmopolitas do mundo.

Botádelle un ollo ao cartel e informádevos se inda quedan prazas. Poderedes visitar emblemas de Londres como Buckingham palace, Westminster Abbey, Picadilly Circus, Trafalgar Square ou o máis famoso reloj no marques las horas, o Big Ben.

Xa en Londres poderedes escoller entre facer visitas guiadas ou ir por libre, tendo reservadas habitacións de 2 ou 4 persoas nunha hospedaxe co almorzo incluído.

A viaxe será en autobús dende Pereiras a Porto, con voo dende o aeroporto Sá Carneiro ata o londinense de Stansted ou Gatwick, e igualmente á inversa para a viaxe de volta, todo isto incluido.

Good trip. Have fun!

SOPRANOS E TENORES

O pasado sábado 12 de novembro o centro de Pereiras enchéuse de voces corais. Sopranos, mezzo-sopranos, contraltos, contra tenores, tenores, barítonos, baixos e baixas, altos e altas trouxeron música vocal de calidade ao noso centro social e cultural.

A coral polifónica Acordes de Bueu encargouse de abrir o acto, non antes da acertada presentación por parte do noso compañeiro Oscar Pérez que amosou as súas dotes ao micrófono.

A súa maior porcentaxe de voces feminina ofreceu a música máis aguda do día e tamén a máis intercultural con aclamadas versións da música popular centro e sud américana.

Despois poidemos gozar das pezas ofrecidas polos compoñentes da Coral do Centro Socio comunitario de Tui con predominio de populares pezas locais.

Pechou o acto a coral Nosa Terra, anfitrións do evento, e que elevou ao máximo os decibelios por tratarse, cos seus 38 compoñentes, da agrupación máis numerosa.

Os aplausos repartíronse por igual entre todos os intervintes, destacando a atención con que os membros de outros grupos seguían as actuacións dos seus colegas de ocioso gusto musical.

O apartado musical do día pechóuse dando as gracias pola participación por parte da Avv. Nosa Terra mediante a entrega dun agasallo conmemorativo aos representantes de cada coral.

Cumplindo cos preceptos das datas fíxose unha suculenta homenaxe a San Martiño, e todos e todas participantes e espectadores poideron saborear castañas asadas, por certo, de considerable tamaño.

Bon appétit e que a música non pare.

REUNIÓN CO GOBERNO MUNICIPAL

Este pasado martes tivo lugar unha reunión entre a Xunta Directiva da asociación e os concelleiros e concelleiras que forman o goberno local de Mos.

Nela tratáronse os temas máis urxentes dos que precisa a parroquia así como os novos proxectos a incluir nos vindeiros orzamentos.


Aquí vos deixamos o escrito que se lles transmitiu coas demandas da asociación e veciños e veciñas:



A Asociación veciñal e cultural “Nosa Terra” de Pereiras, dentro da súa función de transmitir as necesidades da parroquia e as inquedanzas dos seus veciños/as ás institucións locais, fai entrega do presente escrito para que sexan considerados, e se tomen as medidas oportunas, para a resolución dos temas que se enuncian.

Queremos resaltar que gran parte das demandas xa foron comunicadas durante os últimos 4 anos en diferentes reunións e escritos sen ter sido solucionadas nin producirse informacións sobre as xestións realizadas.

A continuación relátanse todas as necesidades diferenciadas por áreas para que sexan transmitidas aos diferentes responsables do Goberno Municipal, resaltando ao final as necesidades máis urxentes así como as que solicitamos sexan incluidas con partidas específicas no orzamento a aprobar para o próximo exercicio.

Pereiras, 25 de outubro de 2011.

A Xunta Directiva.


1) Estradas e camiños.

a) Restitución do muro derruído na estrada Quinteiro - A Furna.
b) Camiño do Polvora (Roublín), enriba da presa da Lama. Muro derruido.
c) Retirada de muro na estrada Campo de Eiró - As Vides (fronte a casa de Suso Romero) debido a súa perigosidade cara a circulación vial. Na actualidade atópase ocupando parte da vía asfaltada.
d) Proceder ao deslinde do camiño A Furna - Albán.
e) Muro dunha casa que ocasiona perigro, en frente da casa de Carlos Bastos, estrada Campo de Eiró-Cristo de Belén.
f) Instalar pilotes diante do edificio no Cristo de Belén.
g) Asfaltado estrada Foxes, antiguo aserradeiro.
h) Humanización (realizar beirarrúas ou beiravías delimitadas) na estrada A Crus - Colexio Atín - Estrada O Porriño Gondomar.
i) Maior control da obra Pereiras-Tameiga, demasiadas molestias por movementos de terras, afección de cableado público, etc.
j) Diante do Colexio Santo Tomas os coches aparcan enriba da acera ocasionando perigo por falta de visibilidade.

2) Alumeado.

a) Non hai aportacións.

3) Sinalización e espellos.

a) Sinal de stop no cruce estrada pista San rafael e estrada A Florida-As Vides.
b) Instalación de sinal de stop no cruce de As Vides (ao lado da panadería), que foi derribado hai algún tempo.
c) Instalación de espello no cruce da estrada do Casal coa estrada de circunvalación do Quinteiro, xa que se trata dunha curva moi perigosa e con escasa visibilidade.

4) Saneamento.

a) Reparar o alcantarillado na zona anexa ao paso da autopista no barrio de Roublín xa que sufriu o seu afundimento.
b) Conexión á rede xeral do alcantarillado instalado en Roublín.
c) Inclusión na previsión de alcantarillado das zonas da parroquia ainda carentes de saneamento.

5) Canalizacións.

a) Canalización de augas na estrada Campo de Eiró - Cristo de Belén (fronte a casa de Marcial), xa que a auga da choiva baixa pola estrada, e ao final da recta entra directamente nos terreos da casa.
b) Instalar arquetas no lavadoiro da Crus.
c) Na Mouta (Casal), entrada casa Manuel Villar, cambiar tubería.

6) Fontes.

a) Adecuación, como se fixo coa fonte de Couso, da fonte “Da Prova” en Campo de Eiró, e da fonte “Das Animas” en Casalmorto, xa que o seu continuo deterioro vai levar á desaparición das mesmas.
b) Fonte de A Furna. Traslado ao lado do camiño, quedando nun lugar público e con mellor accesibilidade, e canalización da auga que anteriormente ía ao río que actualmente se atopa canalizado.

7) Recollida de basura.

a) Remplazar contenedores no cruce de Carola, Campo de Eiró, onde a marquesina.

8) Medio ambiente.

a) Limpeza de maleza en finca anexa á estrada do Cristo de Belén (fronte a casa de Marcial).
b) Habilitar un control, en conxunto coa Consellería de Medio Ambiente, para a inspección de verquidos contaminantes sobre o os acuíferos existentes e todo o medio en xeral, procedentes de lavadoras, fregadoiros, piscinas con auga clorada, etc.

9) Centro Cultural “Os Castros”.

a) Aportar algunha achega para a eliminación de barreiras arquitectónicas no Centro Cultural Os Castros, para a instalación dun ascensor e a construcción de ramplas.
b) Aportar algunha achega para mobiliario co fin de comezar a utilizar as zonas acondicionadas na planta superior.
c) Axuda para a compra dun proyector para realización de actividades audiovisuais.
d) Axuda para a construcción dunha estructura cuberta na zona traseira do Centro Cultural.

10) Emprego.

a) Información sobre medidas tomadas.
b) Publicación de ofertas nos centros sociais.
c) Posibilidade de crear un obradoiro a través da asociación.

11) Deporte.

a) Programar algunha actividade, campionato ou curso para realizar na pista polideportiva anexa ao Centro Cultural.

12) Outros.

a) Recuperación do terreo da Carballeira de Casalmorto, antigo Campo da Feira. Habilitalo como espazo de paseo e convivencia para os veciños. Limpeza, instalacións de bancos, etc.
b) Recuperación de sendeiro e canalizacións en toda a ruta dos Muiños.

13) Xerais concello.

a) Incluir na páxina web do concello información referente á Asociación: contacto, actividades, formularios de inscripción, etc.
b) Fomentar a interacción entre as diferentes asociacións culturais e veciñais do municipio; fomentar a mobilidade na realización de actos, cursos...


RESUMO NECESIDADES PRIORITARIAS.

ACCIÓNS PRIORITARIAS XA SOLICITADAS QUE TEÑEN CARACTER URXENTE:

• Restitución do muro derruído na estrada Quinteiro - A Furna.
• Reparar o alcantarillado na zona anexa ao paso da autopista no barrio de Roublín xa que sufriu o seu afundimento.
• Saneamento dende estrada Pereiras-Tameiga ata o Quinteiro.

ACCIÓNS PRIORITARIAS CON NECESIDADE DE RESERVA ORZAMENTARIA PARA O PRÓXIMO EXERCICIO:

• Humanización (realizar beirarúas ou beiravías delimitadas) na estrada A Crus – Colexio Atín - Estrada Gondomar O Porriño.
• Aportar achega para a eliminación de barreiras arquitectónicas no Centro Cultural Os Castros, para a instalación dun ascensor e a construcción de ramplas.
• Instalación de alcantarillado nas zonas da parroquia ainda carentes de saneamento.

ACCIÓNS CON CARACTER XERAL:

• Maior consulta e participación dos veciños/as e a asociación nas accións municipais.
• Convocatoria e recepción de ideas previas a calquera obra.
• Realización de reunións reservadas a aqueles que poidan aportar ou teñan coñecementos sobre o traballo a realizar.
• Exposición pública no Centro Cultural de planos, proxectos, etc, para comentarios e propostas.
• Recollida de documentación, fotos, etc, no caso de tratarse de reformas de elementos históricos; fontes, muíños, ...
• Información sobre as resolucións nas convocatorias de achegas.

UN PASEO POLA HISTORIA

Despois de dúas fases de rehabilitación levadas a cabo nos Muíños da Salgueira xa se pode gozar dunha importante parte da nosa historia local inda moi presente entre os máis maiores.

O sábado fíxose unha simbólica inaguración da recuperación destes muiños e decenas de veciños e veciñas de todas as idades percorreron a ruta habilitada a carón destas antigas construccións.

A andaina comenzou no CC "Os Castros" dirixíndonos cara a súbida a Cela para facer a ruta en dirección inversa, dende os muíños da Budiela ata chegar ao muíño da Almorada, o cal foi erróneamente rebautizado como Alborada. O bo tempo fixo contribuiu a un distendido paseo, inda que en ocasións se levantase polvo abondo ou algunhas zonas fosen máis compricadas para determinados vehículos.





Neste último muíño da Almorada, na parte máis baixa da ruta, tivemos oportunidade de escoitar a un representante da asociación Amigos dos Muíños que nos fixo ver a importancia de non perder este patrimonio.



Esta agradable tarde rematou con chourizo, viño e música e baile ata o solpor. Faite amigo da Avv Nosa Terra e descarga todas as fotos en Facebook.




Se os muíños falasen...

PEREIRAS GOZOU DUNHA XORNADA DE BTT

O pasado 09 de outubro celebrouse a Iª Kedada BTT "Nosa Terra" polas terras e montes de Pereiras e arredores, tentando aproveitar as zonas todavía virxes de asfaltos e cementos.



Á chamada da Asociación acudiron máis de 400 ciclistas que desbordaron as previsións de participación, e que case ás dez da mañán saíron do CC "Os Castros" para percorrer a parte baixa da parroquia, voltar ao punto de saída e comenzar unha complicada subida ata os montes de Pereiras, Tameiga e Beade.


Os participantes fóron distribuindose según as súas forzas e habilidades co manillar e os pedais. Pouco a foron percorrendo prados, pistas, camiños, carreiros, pontes, palés e todo tipo de superficies, sendo unha das zonas de máis beleza a que se fixo coincidir coa ruta dos muiños da Salgueira.



A recompensa ao esforzo chegou co avituallamento, no que os sufridos e agerridos ciclistas aproveitaron para repoñer forzas, descansar ou realizar os necesarios exercicios de estiramento. Tampouco faltou quen pedía continuar de seguido para non coller frío.



Despois chegou o divertimento co rápido e entretido descenso para voltar ao Local Social.

Todos e todas que así o desexaron poideron darse unha ducha á chegada e aproveitar para limpar os rastros da ruta das súas bicicletas. A continuación sorteáronse unha serie de agasallos cedidos polos nosos patrocinadores.


Agradecemos a todos os voluntarios e voluntarias a súa participación, colaborando na elaboración da ruta, na organización dos participantes, avituallamento, cortes das estradas, asistencia técnica e médica, etc.


A boa sensación que deixou esta xornada fai esperar que se celebre unha segunda edición o próximo ano, no que esperamos contar novamente coa axuda de todos, ciclistas e veciños.