NIN DARRIBA NIN DABAIXO, PEREIRAS DO OESTE

Pim, pam, pum tengo una pistola,
pim, pam, pum que dispara sola,
pim, pam, pum tengo yo un revolver,
pim, pam, pum que dispara doble!

... e os indios e as indias tiñan arcos, machetes, plumas e ata sospeitosos complementos.

Pereiras convertiuse por uns días de febreiro no Far West, lonxano oeste que dicimos por aquí, onde os poboadores oriundos e forasteiros conquistadores loitaban polas terras nunha imposible convivencia que sí conseguiron os nosos veciños e veciñas.

Ao ritmo de Daddy Yankee, Toby Love, Red Nex e o famoso cancan, a coreografía levaba a comanches, vaqueiras, cabareteiros, cactus e demais fauna cara un lado e cara outro para divertimento dos asistentes aos desfiles de Tomiño (venres), Mos (domingo) e O Porriño (sábado, martes, e inda houbo que ir chorar o mércores).


A nosa carroza dividía simétricamente unhas e outras terras incluindo un saloon, unha vivenda india e un cabalo que fixo as delicias dos máis pequenos deseosos de cabalgar e deseosos os pais de retratalos.





Ao final o sangue non chegou ao río, non houbo tiroteados nin aforcados, non se atrapou aos rexidores foraxidos buscados baixo gran recompensa, e os licores dispensados polos apostos cantineros non doblegaron a ninguén ... bailouse, cantouse, riuse...


o próximo ano novas máscaras, mesmas gomas.

UN PASEO POLO THAMES

O pasado mes de xaneiro unhas deceas de persoas acudiron á convocatoria da asociación Nosa Terra para pasar uns días na capital do imperio dos fillos da Gran Bretaña.

Londres acolleu aos nosos veciños e veciñas con menor inclemencia meteorolóxica da esperada e así fíxose máis levadeira a apretada axenda para poder visitar os máis insignes e carismáticos emplazamentos da cidade dos neboeiros.

Non faltaron os desplazamentos nos Routemasters, históricos autobuses de dous pisos que se manteñen en funcionamento para goze e disfrutes do turisteo. Outra atracción foron as vérmellas cabinas telefónicas, xa case pezas de museo, e incluso os máis desprendidos se animaron a consumir nos clasistas comercios de Harrods.

O percorrido continuou por mar e aire, cun minicruceiro polo Támesis e unhas cantas voltas na noria London Eye, sen que se tivese lamentado ningún mareo por mal de alturas ou aquafobia.

E despois duns cantos restaurantes, pubs, rutas en metro, e de retratarse cos máis sinalados edificios e monumentos houbo que volver ao país de orixe. Según nos contan foi bo, moi bo, pero curto ... e xa se sabe ... o bo se breve... dúas veces bo, así que...


Congratulations!

MÁIS FORMACIÓN, MÁIS DIVERSIÓN

A Asociación Nosa Terra puxo a andar esta primavera un novo conxunto de cursos para ben formarse e mellor gozar.

Non deixes pasar a oportunidade e inscríbite no que máis che vaia a xeito. Temos cursos con prazas vacantes, outros agardando por solicitantes e novas edicións, e outros que están agardando a que ti os suxiras porque a nos ainda non se nos ocurriu.

Infórmate e participa.

ANDAINA: CAMIÑO A SAN ANTOÍÑO

Despois do éxito das últimas rutas e andainas propostas pola asociación Nosa Terra, este domingo 5 de febreiro de 2012 propoñemos un novo e interesante movemento polas terras de Mos.

Seguindo as notas que o grande Andrés Lapique do Barro lle cantara á noutrora admirada Conchita, faremos o camiño a San Antón, camiño a San Antoíño e á aldea de Alfacuca.

O punto de encontro será ás 9:30h no CC "Os Castros" de Pereiras-Mos e dende alí desprazarémonos ata o inicio do sendeiro do Louro (plásticos barcia) onde ás 10:00h botaremos pé a terra e comezaremos a ruta, de baixa dificultade, duns 4,5km ida ata o noso destiño para despois desandar o andado e sobre as 14:00h estar xa na casa para o xantar.

Ademáis, o historiador e escritor Javier Baquero Rotea explicaranos a historia da singular aldea de Alfacuca para así complementar a saudable actividade cuns cantos coñecementos antropolóxicos.

Bo camiño.

UNHA NOVA EDICIÓN DO NOSO BOLETÍN

Coincidindo cos últimos días do 2011 elaborouse e repartiuse entre tod@s os soci@s e veciñ@s de Pereiras unha nova fornada do noso anuario informativo.

12 páxinas repartidas en diferentes seccións que inclúen:

* Actos e actividades realizadas.

* Cursos e formación impartida.

* A asociación co deporte.

* Entrevista con Manuel Táboas, representante da Coral.

* As novas tecnoloxías na Nosa Terra.

* Entrevista con Orindo Táboas, presidente da Avv.

* Reivindicacións das necesidades de Pereiras.

* Datos sobre os nosos asociados.

* Novas iniciativas a implantar no 2012.

Boa lectura!

Pídeo se inda non o tes:

FIN DE ANO NA CASA!!

A asociación Nosa Terra celebra a entrada do novo ano na súa casa, o Centro Social e Cultural “Os Castros”.

Dende a unha da mañán contaremos coa música do DJ JUAN JOOMAS. Música de calidade e tamén de festa, pra cantar e pra bailar; Give me everything, Ai se eu te pego, Una vaina loca ... todas soaran na nosa festa, pero tamén merengues, cumbias, rancheras, pasodobles e por suposto ... a muiñeira de chantada.

Haberá cotillón, sidra, chocolate con churros... todo de balde, e festa ata que non queden folgos.

Bo cambio de ano e moi feliz , próspero e bisesto 2012.

NOVE DÍAS E MEDIO

Moitos foron os que na primeira semana de decembro se deixaron seducir pola oferta cultural da nosa programación Terra de Cultura.

9 días consecutivos de acontecementos que comezaron coa charla de cómo tratar a pel no inverno por Asunción Sío e Charo Rodríguez, e remataron co sorprendente teatro Malasombra e a súa obra "Go On" sobre o descubrimento por parte duns Yankis das costumes e a idiosincrasia galega.

Unha semana despois os socios e socias reunímonos para desexarnos boas festas, contemplar os actos do ano mediante unha proxección de fotografías e recibir os premios sorteados con especial sorte para Alberto Rodríguez que se levou a cesta de nadal. Bo proveito.

Fotografías e vídeos pasaron polo ciclo Lembranzas de Pereiras. Caras de sorpresa, carcajadas a eito e agudos comentarios acompañaron as imaxes de pasados anos do teatro, play back, baile, e tamén da coral, que xa en vivo e en directo volveu deleitarnos nun novo certame conxuntamente con Atlántida de Matamá.

Representáronse así mesmo diversas obras de teatro a distintos niveis e estilos, que gustaron máis ou menos dependendo dos gustos e expectativas dos presentes.

Os grupos Arandeiras e Chavellos, de recente creación e con gran presenza local recibiron moi boas críticas do público, inda que máis pola música que polos nomes escollidos, e o grupo de acordeóns de Valadares volveu demostrar a súa calidade melódica.

Sorprenderon tamén as bailarinas de Galicia en Danza co seu ritmo e coreografiada mobilidade que animou a algúns a pedir a formación dun grupo de danza local.

Os máis pequenos tamén gozaron desta semana co concurso de debuxos, o obradoiro de títeres e as películas infantís proxectadas.
Pereiras tamén se moveu, a pé e en bicicleta, polas estradas e polos camiños. Socios e veciños acudiron á proposta de rutas e competicións, e os muiños da localidade recibiron en tan só un día máis miradas e expectación que en varios anos.

Todo isto e moito máis aconteceu no noso local e nos seus arredores.
E volverá acontecer.
Non o perdas.